El en Br. Bainac car es francs e metens,
En Escotz que governa las garidas els genhs,
Ab lor belas companhas sobrans e atendens
Tenon la barbacana del Pont nou finamens.
Sus lo pon[t] del Bazagle qu’es faitz novelamens
Son li arquier mirable que tiron primamens,
Que defendol ribatge e los abevramens,
Que lunha naus no i venga ni negus malvolens.
Li baro tuit essems an jurat sobre sens
Que per lunha temensa ni per envazimens,
Ni per colps ni per plagas ni per nulhs espavens,
Ni per mort ni per glazis, mentre sian vivens,
Negus de lor nos parca de lors establimens ;
Els baros de Tholoza ben acordadamens
Retengo cavaliers e borzes e sirvens
Dels milhors de la vila e dels melhs combatens,
Que sus la major coita sia l’acordamens.
La vila es establida dels baros finamens,
E de lor de Tholoza ab els mescladamens,
E del glorios martir e dels autres cors sens ;
Car lo Filhs de la Verge qu’es clars e resplandens,
E dec sanc preciosa perque la merces vens,
Gart razo e dreitura, elh prenga cauzimens
Que los tortz e las colpas sian dels mals mirens !
Quel filhs del rei de Fransa ve orgulhozamens
Ab .XXXIIII. comtes et ab aitantas gens
Que non es en est setgle negus hom tant sabens
Que puesca azesmar los milhers ni los cens,
Quel cardenal de Roma prezicans e ligens
Que la mortz e lo glazis an tot primeiramens,
— 9566. Il paraît manquer ici un vers.