LI ROUMANS D’ALIXANDRE.
Qui viers de rice estore viut entendre et oir, Folio 4a
pour prendre bon exemple de proecce aquellir,
de connoistre raison d’amer et de hair,
de ses amis garder, et cièrement tenir,
ses anemis grever, c’uns n’en puist avancir,
les laidures vengier, et les bienfais merir,
de canter, quant lius est, et à terme sofrir.
oies donques l’estore boinement, à loisir ;
ne l’ora gueres nus, cui ne doie plaisir ;
cou est de l’ millor roi que Dex laisast morir.
d’Alixandre vus voel l’estore rafresçir,
que[1] Dex donna fierté et è l’ cuer grant air,
que par mer et par tiere osa gent envair,
et fist à son commant tout le pule obéir,
et tans rois orgillous à l’esporon servir.
qui service lui fist, ne s’en pot repentir,
quar tous fu lor[2] corages à faire lor plaisir ;
et il i para bien as durs estours soufrir,
quar, au destroit besoig, ne li volrent falir.
qui servir ne l’ degna, ne l’ pot tors garantir,
ne destrois, ne maupas, tant seust lonc fuir.
à l’eure que li enfes dut de sa mère iscir,
demoustra tex,[3] par signe, qu’il se feroit cremir ;
quar l’air convint muer, le firmament croisir,
et la tiere croler, la mer par lius rougir,
