ce fu senefiance, ne vus en qui mentir,
por moustrer de l’enfant qu’en est à avenir,
et com grant signorie il aroit à tenir.
L’estore d’Alixandre vus voel[1] ci commencier
en roumans, c’à gent laie doit auques profitier ;
et teus set bien finer qui ne set commencier,[2]
✸ ne mostrer bele fin pour s’ouvraige essaucier.
qui ces vers detenra, ce vus os tesmogner, F. 4b
ne devra avarise lever, ne essaucier ;
quar gentius cuers ne puet par icou essaucier.[3]
qui trop croit en tresor, trop a le cuer lanier,
ne puet conquerre ounor, ne tiere justicier.
je ne vus commanc mie de Landri ne d’Augier,
ains vus commenc les vers Alixandre d’Alier,
de cui sens et proecce fisent confanonier ;
ici prenge regart, ki se viut afaitier
et de boines costumes sen cuer aparellier.[4]
la vie d’Alixandre, si com ele est trovée
✸ en pluisors liex escrite, et par bouce contée,
ele fu à son nestre par signe desmostrée,
que percoivre s’en pot toute cose senée ;
quar li airs en mua, c’est verités prouvée,
et parurent esclistre sor le noire nuée,
li firmamens croisi dont fu grans estonnée,
et la tiere en tranla par toute la contrée,
et la voie del ciel refu par lui tantée,[5]
quant la caiere d’or en fu en l’air portée
par les iiii grifons, ù ele est acuuplée ;[6]
et fu d’astronomie sa cars enluminée,[7]
quar de toutes estoiles connut la compassé.
por cou, crola la tiere en icele jornée ;
quar cele eure naiscoit la persone doutée,
à cui la signorie de l’ mont seroit donnée,
et la mers en rougi, por cele destinée
Page:Lambert li Tors - Li romans d’Alixandre, 1846.djvu/29
Cette page a été validée par deux contributeurs.
2
ENFANCE D’ALIXANDRE.
![](http://upload.wikimedia.org/wikipedia/commons/thumb/6/6e/Lambert_li_Tors_-_Li_romans_d%E2%80%99Alixandre%2C_1846.djvu/page29-1024px-Lambert_li_Tors_-_Li_romans_d%E2%80%99Alixandre%2C_1846.djvu.jpg)