« a caus qui sont o lui est frans et de bone aire,[1]
« et a ses anemis est fel[2] et de mal aire.
« ne vus cuide laisier ne castiel ne repaire,
« ains vus en cuide bien par vive force traire. »
quant Nicolas l’oi, de riens ne li pot plaire,
il en jure sen cief et sa pelice vaire,
s’as puins le puet tenir, il li fera contraire :
« Je li quit destemprer si felon laituaire,
« n’aideroit sen parent, s’il li veoit l’uel traire.
li mes dist en riant à Brian de Calvaire :[3]
« de lonc le manecies, il ne vus prise gaire. »
Mervelle ot Alixandres, quant il ot de le guerre
que li rois Nicolas viut treu de sa tiere.
par les lointains pais fist les bacelers[4] querre,
qui tout vegnent a lui qui or volront conquerre.
li nouviaus rois de Greses ses grans tresors desere ;
nus n’en puet remanere en huge n’en soustiere ;
a ceus le fait douner que li povretés navre,[5]
et venront avoec lui les grans paines conquerre.[6]
De cou fist Alixandres que gentius[7] et que fiers,
que frans et deboinaires, que gentius chevaliers,
quant ot par le pais mandé ses soudoier,
par congié de sen père a pris les useriers,
les sers de pute orine, les felons pautonniers
qui les tresors avoient et les mons de deniers,
qu’es laisoient pourir a muis et a sestiers.
tous les a departis as povres chevaliers,
as gentius bacelers, que il estoit mestier,
et les a atornés d’armes et de destriers.
n’i a i. isi povre qui n’ait ii. escuiers.
quant furent asanlé par les plagnes d’Aliers,
plus en ot Alixandres de lx. milliers ;
Emenidus d’Arcade fu ses confanoniers.
Onques n’isci de Grese tel jent por[8] Felipon,
com Alixandres ot, si nos dire le son,[9]
en la tiere d’Alier de coi ot le sornon.
Page:Lambert li Tors - Li romans d’Alixandre, 1846.djvu/44
Apparence
Le texte de cette page a été corrigé et est conforme au fac-similé.
16
ENFANCE D’ALIXANDRE.