la veiscies tendu maint rice pavillon ;
Aristote[1] se jut sor i. pale[2] esclavon.
Alixandres apele, si l’a mis à raison :
« eslisies xii. pers qui soient compagnon,
« qui menront vos esceles,[3] totes par devison.[4]
« s’ames vos chevaliers et faites lor gent don ;
« vus saves, qui bien done, volentiers le sert-on,
« et par douner puet-on amolier felon.
« qui tout viut et tout part, des auquans le dist-on.[5]
« se voles larges estre, plus en seres preudon,
F. 6c« et conquerres la tiere entor et environ,
« si que nus hom n’ara vers vous desfension. »
Alixandres l’oi, si dreca le menton,
et a dist à sen mestre : « ci a bele raison ;
« eslisies vus meismes de qui nos le feron. »
— primerains i metes Tolomé et Clincon,
« Lincanor et Filote, et Dant Emenidon,
« Perdicas et Lione avoec Antigonun,
« et le conte Arides, Ariste et Caunon,
« Antiocus avoec ;[6] or sunt xii. par non.
« icist sunt tot preudomme et chevalier preudon[7]
« Emenidus d’Arcade por[8] vostre confanon. »
et a dit Alixandres : « à Deu bénéichon. »
En icel jor que furent eslit li xii. pers,
que li rois Alixandres les ot fait deviser,
a fait monter sa gent et ses grailes soner.
è l’ regne Nicolas volra tres or[9] aler.
Emenidus[10] commande son confanon porter ;
jamais ne finera, si venra à la mer.
devant soi, encontra li rois i. baceler
qui les ceviaus ot blont et le viaire cler ;
son samblant ne sa face ne vus sai deviser ;
de plus jentil dansiel n’ora nus hom parler.
afulés d’une cauce, n’ot houce ne soller.
à ceus devant a pris le roi à demander ;
Page:Lambert li Tors - Li romans d’Alixandre, 1846.djvu/45
Le texte de cette page a été corrigé et est conforme au fac-similé.
17
ENFANCE D’ALIXANDRE.
![](http://upload.wikimedia.org/wikipedia/commons/thumb/6/6e/Lambert_li_Tors_-_Li_romans_d%E2%80%99Alixandre%2C_1846.djvu/page45-1024px-Lambert_li_Tors_-_Li_romans_d%E2%80%99Alixandre%2C_1846.djvu.jpg)