LA VIE DE SAINT BRIEUX
Saint Brieuc, l’un des Patrons de nostre Bretagne Armorique, & premier Evesque du Diocese qui, de son nom, s’appelle à present S. Brieuc, nasquit en la Province de Cornoüaille Insulaire (maintenant nommée la Principauté de Walles) en la Grande Bretagne. Ses parens estoient nobles & riches, mais Idolatres ; son Pere avoit nom Cerpus & sa Mere Eldruda, à laquelle, estant enceinte, une nuit, un Ange apparut & luy fit sçavoir qu’elle portoit dans ses flancs un enfant qui seroit chery de Dieu & éclaireroit son pays de la lumiere de la Foy de Jesus-Christ, luy commandant de parler à son mary & tascher de luy faire quitter la vaine superstition de ses Idoles, pour adorer un seul et vray Dieu.
II. La bonne Dame, le matin, à son réveil, se souvenant de son songe, en donne avis à son mary, l’avertissant du commandement qu’elle avoit receu de luy persuader de quitter ses Idoles ; mais Cerpus ne tint compte de ce salutaire avertissement, le tenant pour fable & imagination de femme, pour lesquelles il se donneroit bien garde de quitter la Religion de ses ancestres ; mais la troisiéme nuit aprés, comme il prenoit son repos, le mesme Ange, qui s’estoit apparu à sa femme, se presenta devant luy, & luy revela la mesme chose touchant l’enfant dont sa femme estoit enceinte & luy fit commandement de quitter sa fausse Religion, & se disposer à recevoir celle de Jesus-Christ ; le tença bien aigrement d’avoir esté incredule aux propos de son épouse. Cerpus, le matin venu, convoqua tous ses amis, &, leur ayant fait recit de l’aparution susdite, de leur avis, se resolut d’obeïr à cette semonce, &, pour ce, renversa & brisa toutes ses Idoles & distribua la moitié de son bien aux pauvres, quoy qu’il ne se rendist incontinent Chrestien.
III. Après les neuf mois accomplis, la bonne Dame Eldruda accoucha & mit au monde un bel enfant, lequel fut, par elle & son mary, nommé Brieuc, (nom que l’Ange leur avoit revelé). Ils le nourrirent & éleverent fort soigneusement, toûjours memoratifs
