Andui s’en vont par une sente,
N’i a celui qui son cuer sente,
Que fain avoient fort et dure ;
Mès par merveilleuse aventure
Une grant andoille ont trovée
Lez le chemin en une arée.
Renart l’a premerains saisie,
Et Tybert a dit, Diex aïe,
Biax conpains Renart, g’i ai part.
Conment dont, ce a dit Renart,
Qui vos en velt tolir partie ?
Ne vos ai-ge ma foi plevie ?
Tybert moult poi s’i aséure
En ce que Dant Renart li jure.
Conpains, dist-il, qar la menjons.
Avoi ! dist Renart, non ferons,
Se nos ici demorion,
Jà en pais n’i mengerion :
Porter la nos covient avant.
Et dist Tybert, je le gréant,
Qant vit qu’autrement ne puet estre.
Renart fu de l’andoille mestre,
Par le mileu as denz le prent,
Que de chascune part li pent
La droite moitié égaument,
Ne la viaut porter autrement.
Qant Tybert voit que il l’enporte,
Moult durement s’en desconforte :
Page:Le Roman du Renart, 1826, tome 1.djvu/113
Cette page a été validée par deux contributeurs.
