Ce peliçon sanz demorance,
Que poi pris mès vostre puissance.
Trop portez basse cele chiere,
Mal Ors hui cest jor vos requiere !
Ce que dist li vilains engrès
Bruns li Ors qui d’iluec fu près,
A tot oï et escoté.
En un buisson avoit boté
Le col et les pates devant,
N’avoit mie poor de gent,
Que nul chien nel’ pot iloc prendre.
Por miex escoter et entendre
S’estoit-il el buisson repos :
Ne vousist pas por trente sos
Que n’éust le vilain oï.
De la pramesse s’esjoï,
A soi-méismes dit toz coiz,
Bien m’est avenu ceste foiz ;
Or aurai-ge, Diex merci, proie,
Sanz nule faille ceste voie
Ne m’irai or pas delaiant
En aventure por noiant.
Or sai-je bien où chargerai
La proie que j’enporterai.
Un buef aurai seul à ma part,
Rogel qui fu seignor Liétart,
Or li guerredonneré bien.
Sovent m’a fet sivre à son chien
Page:Le Roman du Renart, 1826, tome 2.djvu/227
Le texte de cette page a été corrigé et est conforme au fac-similé.
