De tout avoie-je planté,
Bevoie et mengoie à mon gré,
Homs ne beste ne m’asailloit,
Nule chose ne me failloit ;
Mès por ce que je voil bien fere,
Qui onques mès ne me pot plere
Et qui moult poi l’ai maintenu,
Por ce m’est-il mal avenu.
Jamès nul jor bien ne ferai
Ne jà verité ne dirai,
Reson ne loiauté ne droiz,
Por ce que oan une foiz
Avoie à bien fere entendu,
M’en ont li Déable rendu
Le guerredon et la deserte,
Mès mal damage et male perte
M’aviengne de moi et dou mien
Le jor que jamès ferai bien.
Certes jamès bien ne ferai,
Ne à nul jor ne me tendrai
De mal faire en nule maniere,
Il n’a gueres çà en ariere,
De mal fere, si con je croi.
Par cele foi que je vos doi
Plus ai éu et honte et let
Por un sol bien que je ai fet,
Que por mal que je féisse onques.
Sire, fet-ele, dites donques
Page:Le Roman du Renart, 1826, tome 2.djvu/278
Le texte de cette page a été corrigé et est conforme au fac-similé.
