Qui ce vos a fet et conment,
Qui vos a mené cest torment :
Moult par estes depeliciez,
La verité m’en déissiez
Où vos fustes si desciriez.
Renart qui fu forment iriez,
A respondu en sospirant
Or me va la force enpirant,
Hermeline ma douce amie,
Et por ce ne lairai-ge mie
Por dolor ne por febleté
Que vos n’oiez la verité
Conment ai esté asailliz
Et conment je fui malbailliz,
Conment j’ai mal por bien trové,
Je qui sovent ai esprové
Mon sens et ma guile en maint liex,
M’en tornai-ge tot fameilliex.
Un poi devant none l’autrier
En aloie par un sentier
Qui estoit bien près del essart
A un vilain punès Liétart
Qui m’a ceste sause méue.
Moult grant poor avoie éue
De deus mastins qui me sivoient
Et jà plus près de moi estoient ;
Un pou guenchi hors de la voie
Por ce que sanz dote savoie,
Page:Le Roman du Renart, 1826, tome 2.djvu/279
Le texte de cette page a été corrigé et est conforme au fac-similé.
