Page:Le Roman du Renart, 1826, tome 4.djvu/290

La bibliothèque libre.
Le texte de cette page a été corrigé et est conforme au fac-similé.

Seroit sour moi et vous sauvé,
3760Se pour moi estiiés tué.
Li drois est nostres, eaus li tors,
Or soit cascuns hardis de cors,
Car viers le mer irons anuit,
(Or escoutés, ne vous anuit)
En une nave grant et noble
Où poi douterons le Roi Noble.
Forte est, n’a garde de tormente,
Lée et longhe, séure et gente.
Warnie est por vivre douze ans,
3770Onques en mer n’entra si grans.
Conment l’ai faite carpenter,
Signour, vous vaurrai deviser.
Li fons est de male pensée,
Et s’est de traïson bordée,
Et clauwée de vilounie,
Et de honte très bien poïe.
De trecerie en est li mas,
Par ceste nave ert Nobles mas,
Car li sigles est de boisdie.
3780Li coffins dou mast est d’envie
U li galios rampera ;
De cet cofin moult lonc vera.
Et de haïne en est li cables,
A tel cofin est bien metables.
Li nave est batillie entor
De descorde et de poi d’amor.