Page:Le Roman du Renart, supplément, 1835.djvu/114

Où il avoit suris et ras ;
Moult fu joians de ses baras.
A Renart m’en vuel retourner,
Qu’au dit hostel se veult torner
Où il ambla un gras fromaige,
D’où il reçut mortel dommaige :
Par le pié fu pris au broion
Auxi com un autre larron.
Lors se commence à dementer
Que il le convient séjourner,
Ne jamais mal faire ne quiert
Mais bonnement et en pais iert.
Tiecelins l’oit, cuide voir die,
Qui delès un molin s’apuie ;
Il descent jus, qu’il estoit haut,
Mais onques ne fist piour saut.
Se dans Renars le puet tenir.
Tiecelins n’ose avant venir.
Renars l’a véu coarder,
Lors le prent à asséurer :
Amis, fait-il, sà vous traiés,
Quar moult sui navrés et plaiés.
Renars, qui vers lui se tourna,
Li faulz, qui trop s’asséura,
Si ne sout mot quant il sailli ;
Penre le vault, mais il failli,
Et nepourquant quatre des pennes
Li remeistrent entre les gainnez,
Et Thiecelins saut esbahis,
Qui dut estre moult malbaillis.
Thiecelins fu forment plaiés
Dont il fu forment esmaiés ;