Le texte de cette page a été corrigé et est conforme au fac-similé.
Ont entre les deus croiz assise,
Et bien les tient, et fait jostise.
Sor la pierre ot un marregler
Qu’entaillié i ont li bergier.
Là se séoient per à per
Que je vos sai moult bien nommer :
Li uns est li Fremiz Fremonz,[1]
Blans li Hermines li seconz,
Et li tiers fu Thieberz le Chaz,
Et Ros li Esquiriaux li quarz ;
S’orent une andoille trovée
Qui moult estoit bien conraée ;
Ne sai cui ele fu chéue,
Mais cist quatre l’ont recéue.
En poinne sont et en tormant
Que la partissent igalmant :
Enmi est grosse et graille au chief,
De ce est moult granz li meschief,
Quar c’ele fu partot honie
Légierement fust departie.
Tant ont dit et tant ont parlé
Que tuit ensanble ont esgardé
As marrelles la jueroit
Li quex d’aux trestote l’auroit.
- ↑ Fremiz Fremonz, l’ânon.
Bauduinz i fu et Fromonz
Fil Timers…
Renart le Nouvel, t. iv, p. 139.
