Le texte de cette page a été corrigé et est conforme au fac-similé.
On peut bien aẏmer ſans follie
Ne quil en uiengne deſhonneur
Si uillain pencer le foul lẏe
Ja dieu ne luẏ ſcoit pardonneur
Aẏme ma fille car honneur
Ad ce par nature ſeſprent
Qui fait ce quil doẏbt ne meſprent
Honte
Lentree eſt doulce et atraẏant
Ceſt fiel amer de miel confit
Dont lon neſt iamais retraint
Si touſt que ſe faict deſconfit
Non ẏ entrer eſt de prouffit
A tout le ſexe feminin
En la queue giſt le uenin
Amours
Quant lon treuue ung homme ſecret
On le peut aẏmer ſeurement
Et quil ſoit loẏal et ſecret
Pour bien aẏmer entierement
Ainſi garde on legierement
Sa plaiſance iuſques au bout
On ne peut pas aẏmer par tout
Honte
Si neſt choſe tant ſoit ſecrete
Quen la parfin bien on ne ſaiche
Touſiours neſt pas fame diſcrete
