Le texte de cette page a été corrigé et est conforme au fac-similé.
À TEOUFILE GAUTIÉ
Boufo, boufo, Eissero ! se n’enchau lou soulèu :
L’auro noun pou de l’astre amoussa lou calèu.
Quilo e boundo, grand mar ! jamai di dindouleto
Tis ausso bagnaran li rapidis aleto.
Niéu sour, contro lou baus pos embandi ti tron :
Noun i’entamenaras ni li flanc ni lou front.
Ome, sus lou Ventour que toun pas escarlimpe !
Amount veiras de quant lou doumino l’Oulimpe.
E pamens i’ a ’n gigant plus fort que l’Eissero :
Fai pali lou soulèu e tremoula lou ro.
Di négri dindouleto alassarié lis alo ;
E quand parlo, lou tron n’es qu’un brut de mouissalo.