Celà fut le lendemain rapporté à l’Empereur qui diſpoſa du reſte à ſa volonté.
L’Empereur donna à Paramißia tout le bien & les Eſtats de Paratolme. Vn ieune Seigneur la recherche, & elle s’excuſe, ayant reſolution de n’aymer iamais que l’Empereur. Elle fait enſeuelir Paratolme.
Es affaires paſſees de la ſorte, l’Empereur aſſembla le Conſeil, où les Princes & les Seigneurs furent conuoquez, & là fit venir Paramiſſia & les Fortunez, & deuant l’aſſemblee raconta comme par le conſeil de ces beaux ieunes gentilshommes, & la pitié de la belle, il auoit deſcouuert la maudite entrepriſe de Paratolme, & apres pluſieurs loüanges & gratifications, il print Paramiſſia par la main, & la faiſant approcher de ſoy, il la baiſa d’vn baiſer gracieux, & luy dict, Belle, ie vous fay pour iamais part de ma plus particuliere amitié, en aſſeurance de quoy, ie vous donne tous les biens de Paratolme, & ſi vous choiſiſſez party entre ceux qui pourront vous rechercher, ou vous ont deſia recherchee, ie vous donne les eſtats du deffunct, pour en honorer celuy que vous eſlirez, & de faict aucun ne les aura que celuy que vous y nommerez. Il dit auſſi les paroles de gratification