cognoiſſoyent. Leur felicité fut excellente, mais de peu de duree, car la pauure Arleone aymee, & aymant, mettant vn beau fils au monde, laiſſa couler ſon ame, qui s’exala vers le ſiege de repos, laiſſant vn regret indicible au deſolé Cloriſel, qui n’a point voulu en eſtre conſolé : car il ſ’eſt retiré en la vie ſolitaire, ayant baſti vn ſuperbe ſepulchre à ſa chaſte Arleone, ſur lequel il poſa ceſte inſcription en lettres d’or.
Celuy qui fut les delices de ma Mere, deceue en ſon amour, eſt deuenue celle dont i’ay produit lignee. A cauſe dequoy, & pour ſi bon effect, i’ay oublié d’eſtre fille, pour au moyen d’vne tant heureuſe metamorphoſe, eſtre l’vnique de ma chere moitié, que couure ceſte pierre, laquelle i’arrouſe de mes larmes, auec des regrets que ie continueray, tant que ie ſois reduit à meſme ſort : A ce que l’effect d’amour accompli paroiſſe icy.
Toute ceſte auenue eſt figuree d’vn androgyne mixte, auſſi depuis quelques iours Cloriſela eſté mis dans ce tombeau ſelon ſon ordonnance, & l’a-on orné de pluſieurs inſcriptions & enigmes repreſentans la plus belle particularité de la plus belle recherche.
