l’Empereur & à ſes amis qui auoyent ſouuent affaire de luy : Cettuy-ci eſtant preſent à ces actions, & voyant l’occaſion luy eſtre fauorable fit ſigne aux muſiciens qu’il auoit inſtruits, de s’approcher, ils obeirent, & à l’inſtant firent reſonner vn aër, qui eſtoit approprié au ſuiet de la couleur du iour, adonques fut chanté ce petit poëme,
Les bien-heureux obiets des plus douces penſees,
Se rencontrent touſiours ſelon l’opinion,
Et les ames qui ſont en deſirs auancees,
Estiment leurs ſuiets par leur affection.
Les couleurs que le Ciel au plaiſir de la veue,
Va collant icy bas à l’entour des ſuiets,
Rendent auec raiſon toute choſe cognue,
Car icy l’on remarque aux couleurs les obiets,
Donq ſelon la couleur que plus belle on deſire,
On concoit en ſon ame vn ſymbole d’honneur,
Auſſi ceste beauté qu’heureuſement i’admire,
Se propoſe du bien en ſa belle couleur.
Le beau iaune de paille eſt aymé de ma belle,
Auſſi ſon œil iouyt du vouloir de tous cœurs,
Si quelque malheureux vouloit eſtre rebelle,
Comme paille il ſeroit bruſlé de ſes ardeurs.
Ceſte belle couleur ſuit touſiours l’abondance,
Mōſtrāt aux laboureurs leur loyer tout certain,
Pour ce elle ſignifie auſſi la iouyſſance,
Car quand la paille reſte on iouyt du bon grain.
Symbole bien-heureux tu esſeul teſmoignage
Que ma maiſtreſſe vn iour conſtant m’eſtimera,
Puis qu’elle t’ayme tant, c’eſt vn iuſte preſage,
Qu’à mes fidelitez piteuſe elle entendra.
