gaye en courage pour en faire touſiours vne meſme eſtime, c’eſt la preuue de vraye conſtance. Or, Sire, ce iour nous fournira de beaucoup d’exemples d’amours auantureuſes, & non reciproques, ie les nommeray ſcalenes, pource que les vrayes ſont Iſoſceles, parce que chacū y a ſa Dame, & ainſi reciproquement, & auiourd’huy il y a pluſieurs qui ſont à vne Dame, & la recherchent, & elle en deſire pluſieurs pour choiſir. Parquoy le Gouuerneur d’Amelie n’a que voir ſur ceſte ſorte d’Amās, ie requiers pour l’Amour qu’il ſoit dit & iugé, que ce qui deſpendra du hazard ſoit la fin de tous ceux qui ſe prendront à la belle deſiree, à ce que les pretendās ſ’y comportent auec telle dexterité, que leur recherche ne leur vienne à honte, & qu’ils ne pretendent aucune reſource en ce lieu à cauſe de l’honneur.
Le Conſeil vint à l’Empereur par trois fois à cauſe que l’affaire le meritoit, & puis ayant bien digeré le tout, prononça.
Ceux qui ſeront temeraires, porteront l’iniquité de leur faute, & celui que la Belle gratifiera, ſeul ſe pourra tenir pour tel qu’il ſera accepté, car le tout eſt remis à ſa volonté.
