Eſtoufant en mon cœur, mes amours, & ma foy,
Pour ne plus y penſer : adieu Belle maiſtreſſe.
Durant que ceſte Muſique ſe dilatoit des leures ſur les oreilles ententiues, il entra vn enfant d’honneur qui veint auertir les Princes, que Platineſte gouuernante des enfans de Quimalee les demandoit. Ils ſortirent incontinent, laiſſans le bon homme Sarmedoxe pres de l’Empereur, & vindrent receuoir auec tout honneur ceſte Dame, qui en receut vn ſingulier contentement, ils la firent bien & commodément loger aupres d’Olocliree. Les Princes ſceurent par Platineſte, que les vaiſſeaux de Sobare & de Quimalee eſtoyent arriuez, & qu’en ioye & ſanté la Royne de Sobare & la Princeſſe de Quimalee, ſe repoſoyent à Tanette auec leur compaignie, attendans de leurs nouuelles, qu’ils y porterent eux-meſmes : Car auſſitoſt ils monterent à cheual, & veindrent au deuant des Dames en magnifique apparat pour les receuoir, & conduire aux palais qui leur eſtoyent preparez : cependant Sarmedoxe & le reſte de la court deſtinee pres de l’Empereur, l’entreteindrent le reſte de ce iour, puis le conduirent au Palais où ſon ſouper & coucher eſtoyent appreſtez.
