Apres ſouper ſur la brune il vint vn bal de bergers & bergeres. L’Empereur les conſidera fort, & penſe y auoir veu Etherine.
Out plaiſir eſt agreable en ſon temps, & tous ſuiets ont leur rencontre, parquoy cecy eſtant paſſé, il fallut venir à ce qui eſt ordinaire : Car faites ce qu’il vous plaira, ayez tels deſſeins que vous imaginerez, ſi faut-il qu’aux temps limitez vous ſuyuiez les ordonnances mondaines qui ſont de ſe retirer à l’heure du repos, de ſe leuer pour vacquer aux affaires, & de ſe trouuer aux temps de la refection. Encor faut-il s’occuper à ce qui eſt du conſentement vniuerſel : les heures de ceſte expedition ſont notables, elles ſont neceſſaires & vtiles. Par ceſte Ordonnance les Princes vindrent pour ſouper, & furent ſeruis en la ſale haute, où rien ne manqua. La muſique & les ieux furent prolongez, de ſorte que le ſeruice ne fut pas haſté, ce qui fut fait à deſſein, tellement que le iour eſtoit preſques terny & deſia vn petit filon de tenebres ſe meſtoit dans le reſte de la lumiere, qui en bruniſſoit l’eſclat, faiſant que les obiets qui requierēt plenitude de moyēs pour leur apparence exacte, n’eſtoient plus en exiſtence bien perceptible, que voicy vne entree de bergers accouſtrez en diſpots qui parurēt en la court auec
