bonté ou mauuaiſtie de chacun, ſi on y prend garde, parce qu’il faict diſcerner les vicieux, d’entre les vertueux : Si le vicieux le regarde, il eſt terni : car il ne peut ſouffrir le venin du vice : ſi le vertueux ſ’y mire, il ſe tiēt ſplendide & net : Les Dames le peuuēt mieux diſcerner, auſſi Ortofee en eſt la ſecretaire, ceſte eſpreuue eſt cauſe qu’il ne hante icy que des Dames d’honneur qui peuuent y conuerſer en toute franchiſe, pour y reſpirer & reſentir les doux effects de l’Amour pudique, à l’exaltatiō des beaux cœurs qu’vn ſainct zele anime & à l’extirpation des vicieux qui periront honteuſement bannis de cét enclos ſacré, hors duquel ils ſe ruyneront en l’horreur de leurs mauuaiſes concupiſcences. Il diſoit encor & nous l’eſcoutions auec des oreilles bien nettes, que la porte fut ouuerte : pluſieurs cuydoient que ce fut l’Empereur qui à ce que iugeoit Gnoriſe eſtoit aſſez loin encor, c’eſtoit l’ancien Hermite qui venoit voir ce dernier plaiſir, car comme il nous auoit raconté il ſ’eſtoit determiné d’attendre ſon changement, & me reſiner ſa place ſous le bon plaiſir du Roy, ce qui auoit eſté ratifié & auant que ſe releguer en ſa cellule de recluſion deſiroit ſauourer les delices communes aux beaux eſprits ; Eſtant entré le Roy luy cōmanda de ſ’approcher de luy, & le fit ſeoir au banc d’enuiron le ſiege Royal. Alors le Roy ſans faire ſemblant de ce qui ſ’eſtoit paſſé l’autre fois, pource qu’il y en auoit icy auſquels on ne doit encor reueler les myſteres abſtrus, miſt en propos le bon homme ſur l’excellence de la vie d’Hermite, luy demandant pourquoyil l’auoit choiſie : le bon
