Il me semble qu’estrilles tienent
Et qu’entor la teste le piegnent.
Je ne sei comment il l’entr’oignent,
Mes sus la teste le rooignent.
Ileques rois de tous païs
De torchier ne sont esbahis.
Un en i a qui est seignor,
Entre les autres le greignour
Et en noblece et en puissance.
De conreer Fauvel s’avance :
De l’une main touse la crigne
Et o l’autre main tient le pigne ;
Mès il n’a point de miroer,
Il en devroit bien un louer :
Bien devroit mireor avoir,
Quer grant mestier a de savoir
A queil chief i porra venir
De Fauvel si a point tenir.
Emprès les rois les contes torchent
Si doucement que point n’escorchent ;
Prelas et abbés d’autre part
A bien torchier cescun se part,
Sus le dos, entor les coustés,
Nul n’est d’emprès Fauvel osteis,
Sus le ventre et devant le pis ;
L’un torche mielx, et l’autre pis.
Priors, doëns, archediacres
A torchier ne sont pas pouacres :
Un en i a qui est greigneur
Et entre les autres seigneur ;
Son estât mis (FJ met) en oubliance.
