Fauvel est beste appropriee
Per similitude ordenee
A signifier chose vaine,
Barat et fauseté mondaine.
Ausi par ethimologie
Pues savoir ce qu’il senefie :
Fauvel est de f a u s et de v e l
Compost, quer il a son revel
Assis sus fauseté velee
Et sus tricherie meslee.
Flaterie si s’en derrive,
Qui de nul bien n’a fons ne rive.
De Fauvel descent Flaterie,
Qui du monde a la seignorie,
Et puis en descent Avarice,
Qui de torchier Fauvel n’est nice,
Vilanie et Varieté,
Et puis Envie et Lascheté.
Ces siex dames que j’ai nommees
Sont par FAUVEL signifiees :
Se ton entendement veus mestre,
Pren un mot de cescune letre.
De Fauvel, qui si reigne en terre
Par differences et par guerre,
Dirai la diffinition
Pour mielx monstreir m’entencion.
Fauvel beste est nient raisonnable,
Chose apparant et non estable,
Plain de fauseté, vui de voir,
261 E est manque ; BEFJ non raisonnable, C inraisonnable — 263 fauseté est dans A seul ; CEFJ fallace.