— Madame, reprit la changeuse, chacun s’accordera à ce que vous dites ; mais je suis contrainte, à sa confusion et la nostre, puisqu’il est entré en nostre alliance, de vous confesser qu’il ne sçait rien du tout, et qu’il a tousjours exercé si negligemment ceste charge, que son bon voisin le procureur, pour le soulager et l’empescher de rougir, dressoit ordinairement les sentences des procez qui lui estoient distribuez. Et puis Messieurs de la chambre ne les pressent point de ce costé-là, et se contentent quand on leur parle bon françois. Il eust esté aussi habile homme que celuy qui passa après luy, par un malheur extraordinaire, le pouvant et devant preceder par toute sorte de raisons, puisqu’il luy a tousjours offert, et mesme devant ses juges, de vuider ce different de presceance par la capacité, asseurement il eust mieux satisfaict.
— N’est-ce point, dit madame Charles, femme du medecin, celuy qui estoit si fort chargé de chaligourny ?
— Non, Madame, respondit la changeuse ; c’est un de leurs confrères, qui fut receu trois jours auparavant.
— Qu’appellez-vous chaligourny ? demande la maistresse des requestes.
— Madame, dit la medecine, c’est une intemperie froide et humide qui a attaqué les anciens et nouveaux officiers de ce bureau.
