importance, à quoy elle se trouvoit fort empeschée, à cause des chicaneries où l’on desiroit de l’embroüiller. La partie adverse, sçachant la necessité de ce procureur, courtoisement s’adressa à luy, et luy representa que s’il y avoit moyen de passer une sentence en sa faveur, qu’il y avoit dix mille livres à gaigner : ce qui ne fut pas si tost proposé qu’il fust effectué ; et ainsi le procureur commença sa fortune, qui du depuis s’est bien accreuë, car, au retour de cette affaire, sa femme luy fit si bonne chère de la resjouissance qu’elle avoit, que l’appetit luy en vint souvent de faire telles expeditions. Aussi maintenant il est si riche qu’il ne se soucie plus guères de sa practique.
Sur ce discours, la femme d’un advocat dit tout haut qu’il ne falloit point trouver estrange si un procureur s’estoit laissé corrompre pour bastir sa petite fortune, d’autant que les gens de bien n’amassent rien, et qu’elle en voyoit un tesmoignage si certain en la personne de son mary, que pour avoir refusé de prevariquer en sa charge, et avoir esconduit un solliciteur qui l’avoit pressé de ce faire, que du depuis, au lieu de travailler comme il faisoit, il a esté contraint, pour vivre depuis un an, d’emprunter de l’argent à rente.
— Hé quoy ! (ce dit une damoiselle de la ruë Saint-Martin), s’est-il tant engagé comme vous dites ?
— Ouy, respondit une marchande du Palais
