auoit eſté fait auec les Turcs. Et certainement ce conſeil ſembla ſi bon au Roy d’Achem, que l’approuuant pour le meilleur, & pour le plus aſſeuré, il fit tenir preſte vne flotte de cent ſoixante voiles, dont la pluſpart eſtoient Lanchares de rame, & Galiottes, enſemble quelques Calaluzes du païs de Ioa, & quinze Nauires de haut bord, fournies de munitions, & de viures. Dans ces vaiſſeaux il fit embarquer dix-ſept mille hommes, à ſçauoir douze mille combatans, & le ſurplus tous gens de Chiourme & Pionniers. Parmy ceux cy il y auoit quatre mille Eſtrangers, Turcs, Abiſſins, Malabares, Guſarates, & Luzons de l’Iſle de Bornée. Leur General eſtoit vn nommé Heredin Mahomet, beau frere du meſme Roy, marié auec vne ſienne sœur, & Gouuerneur du Royaume de Baarros. Toute ceſte flotte arriua ſans danger à la riuiere de Panetican, où pour lors eſtoit le Roy d’Aaru, auec ſix mille hommes du pays, ſans qu’il y euſt pas vn Eſtranger, tant pour eſtre fort incommodé, que pour auoir vn païs dépourueu de viures pour l’entretien des ſoldats. À leur arriuée les ennemis treuuerent qu’il faiſoit fortifier la tranchée, dont i’ay parlé cy deuant. Alors ſans vſer d’autre délay, ils commencerent à faire iouër leur artillerie, & à battre la ville du coſté de la mer, auec vne grande furie, qui dura ſix iours entiers. Cependant les habitans ſe deffendirent fort vaillamment, quoy que cela ne ſe fit pas ſans que de part & d’autre il y eut beaucoup de ſang reſpandu. Ce qui fut cauſe que le General de Achems connoiſſant qu’il n’aduançoit pas beaucoup, fit mettre pied à terre à ſes gens, qui flancquerent douze groſſes pieces, & ainſi la batterie recommença par trois diuerſes fois, auec tant d’impetuoſité, qu’elle démolit l’vn des deux forts qui deffendoit l’entrée de la riuiere. Ce fut par là meſme qu’à la faueur de certains ballots de coton qu’ils conduiſoient deuant eux, ils aſſaillirent vn matin la principale fortereſſe. En cet aſſaut eſtoit Capitaine vn certain Abiſſin, appellé Mamedecan, qui depuis vn mois, ou enuiron, eſtoit arriué de Iudaa, pour confirmer la nouuelle alliance que le Bacha du Caire auoit accordée au Roy d’Achem, de la part du grand Seigneur, par lequel traité il luy donnoit
Page:Les voyages advantureux de Fernand Mendez Pinto.djvu/111
Le texte de cette page a été corrigé et est conforme au fac-similé.
93
de Fernand Mendez Pinto.
