Page:Les voyages advantureux de Fernand Mendez Pinto.djvu/125

107

de Fernand Mendez Pinto.

Roy d’Achem auoit fait de luy : il tint donc pour la ſeconde fois Conſeil là deſſus, où fut conclu qu’en toutes façons il luy feroit la guerre comme à ſon ennemy mortel, & que la premiere choſe qu’il falloit faire, c’eſtoit de reprendre le Royaume d’Aaru, & la fortereſſe de Panetican, auant qu’il l’euſt fortifié dauantage : le Roy fit diligemment leuer vne groſſe armée de deux cens voiles de rames, dont la pluſpart eſtoient Lanchares, Ioangas, Calaluſes, & quinze Iuncos de haut bord, pourueus de munitions neceſſaires à cette entrepriſe, & fit Capitaine General de cette armée le grand Laque Xemena ſon Admiral, de la valeur duquel les Hiſtoires des Indes traittent en diuers lieux. À cettuy-cy il donna 2000. hommes de combat, & quatre mille de Chiourme, & des Mariniers tous bien choiſis & vſitez à la guerre. Cet Admiral partit incontinent auec ſa flotte, & arriua à la riuiere de Panetican, où eſtoit la fortereſſe des ennemis. Alors ils l’attaquerent par 5. fois, & s’en allerent à l’eſcalade auec 300. eſchelles, s’aydans de pluſieurs inuentions & artifices de feu. Mais cognoiſſant qu’ils ne la pouuoient prendre de cette ſorte, ils commencerent à la battre auec 40. groſſes pieces d’artillerie, leſquelles tirerent ſans diſcontinuer par l’eſpace de ſept iours entiers, à la fin deſquels la plus grande part de la fortereſſe fut ruinée & miſe par terre. Ce que voyant les ennemis, ils donnerent incontinent l’aſſaut, & y entrerent ſi valeureuſement qu’ils y mirent à mort 1400. Achems, la pluſpart deſquels eſtoient entrez le iour d’auparauant que la flotte y fut arriuée, conduite par vn Capitaine Turc nepueu du Bacha du Caire nommé Morado Arraiz, lequel y fut auſſi tué auec deux cens Turcs qu’il auoit auec luy, ſans que Laque Xemena voulut donner la vie à pas vn d’iceux. Apres cela il vſa d’vne ſi grande diligence à faire rebaſtir ce qui eſtoit tombé, s’aydant de ſtacquades de bois & de terraſſes, où la pluſpart des ſoldats trauailloient, qu’en douze iours la fortereſſe fut rebaſtie, & demeura auſſi forte qu’auparauant, ioint qu’il l’augmenta de deux boulleuarts. La nouuelle de cette flotte, que le Roy de Iantana faiſoit aux ports de Bintan & de Compar arriua aux oreilles du Tyran Roy d’Achem, le-