Page:Les voyages advantureux de Fernand Mendez Pinto.djvu/258

240

Voyages Aduentureux

fruits heriſſés de la façon que la nature les fait naiſtre au tronc des rameaux, là ſe voyoit quantité de roſes & d’œillets agencés peſle meſle parmy vne verdure fort agreable de certains arbriſſeaux que ceux du païs appellent Lechias, tous leſquels branchages eſtoient ſi eſpais qu’on ne voyoit point ceux qui ramoient, à cauſe qu’ils eſtoient couuerts de cette meſme liurée. Or sur le haut du tillac de ce vaiſſeau, il y auoit vne maniere de tribune fort riche, doublée de brocatel, & dans elle meſme vne chaire d’argent, & tout à l’entour ſix filles de dix à douze ans, grandement belles, & qui accordoient quelques inſtrumens de muſique à leurs voix, qu’elles auoient fort harmonieuſes ; on les auoit menées de la ville de Liampoo, qui eſtoit à ſept lieuës de là, & loüées pour de l’argent, moyennant lequel on n’y trouue pas ſeulement cela, & ſemblables choſes, mais tout ce dequoy l’on a besoin, & ce en ſi grande abondance, qu’en ce païs-là il y a beaucoup de marchands qui ſont riches du loüage de telles choſes, dont ces peuples ſe ſeruent pour leur paſſetemps & recreation. Ce fuſt donc en cette Lanteaa qu’Antonio de Faria s’ambarqua, & ainsi il arriua au quay auec vn grand bruit de hauts-bois, tambours impériaux, fifres, tambours ordinaires, & pluſieurs inſtruments de muſique à la mode des Chinois, Malayoes, Champaas, Siames, Borneos, Lequios, & autres gens de telle nation, qui eſtoient en ce port ſoubs la ſauuegarde des Portugais, de peur des Corſaires qui couroient cette mer en grand nombre. Ayant mis pied à terre en ce lieu il y trouua vne tres-belle chaire de parade, comme celle qu’on defere d’ordinaire aux Chaems du gouuernement des vingt-quatre principaux de cét Empire ; elle eſtoit ſouſtenuë par huit baſtons d’argent portés par huit hommes des principaux de ce port, tous couuerts de robes neufues, de diuerſes toiles d’or & d’argent richement brodées, auec de fort belles garnitures. Antonio de Faria s’eſtant aſſis en cette chaire, quoy qu’il en euſt fait refus, y fut porté ſur les eſpaules par huit Gentils-hommes veſtus de meſme que les precedents. En cette equipage il fut conduit à la ville, enuironné de ſoixante hallebardiers, richement veſtus à leur mode, & qui auoient en main des hallebardes & des pertui-