Page:Les voyages advantureux de Fernand Mendez Pinto.djvu/287

269

de Fernand Mendez Pinto.

mine qu’il eſtoit homme de qualité, comme nous le ſceuſmes depuis. Cettuy-cy bien eſtonné de voir tant de gens, il ſe laiſſa choir par terre, où ſe debattant des pieds & des mains, il fut vn aſſez long-temps ſans pouuoir prononcer vn ſeul mot. Toutesfois apres qu’il ſe fut vn peu repoſé, il reprit ſa premiere vigueur, & nous regarda tous auec vn viſage ſerain, puis en termes graues & ſerieux il s’enquiſt de nous quelles gens nous eſtions, & ce que nous demandions ? A quoy l’Interprete luy fit reſponse par l’expres commandement d’Antonio de Faria, qu’il eſtoit vn Capitaine eſtranger, natif du Royaume de Siam, & que nauigeant dans vn ſien Iunco plein d’vn aſſez bonne quantité de marchandiſe, pour s’en aller au port de Liampoo, il auoit fait naufrage en mer, d’où il s’eſtoit ſauué miraculeuſement auec tous ceux de ſa compagnie ; & qu’à cauſe qu’il auoit promis de s’en venir en pelerinage en ce ſaint lieu, pour y loüer Dieu de ce qu’il l’auoit ſauué du grand peril où il s’eſtoit veu, il s’en venoit là maintenant pour accomplir ſa promeſſe ; qu’au reſte ſon intention n’eſtoit que de luy demander particulierement quelque aumoſne, par le moyen de laquelle il puſt ſe remettre de ſa pauureté, & qu’il luy proteſtoit que dans trois ans il luy rendroit le double de ce qu’il prendroit. Alors cét Hermite qui s’appelloit Hiticou, ayant penſé quelque temps à ce qu’il venoit d’oüir, regardant fixement Antonio de Faria, Qui que tu ſois, luy dit il, ſçache que i’ay fort bien entendu ce que tu me viens de dire, & qui ie ne voy que trop ta damnable intention, auec laquelle dans les tenebres de ton aueuglement, comme vn Pilote infernal, tu attires & toy & ces autres dans l’abyſme profond du lac de la nuit. Car au lieu de rendre graces à Dieu à vne ſi grande faueur, que tu confeſſes qu’il t’a faite, tu t’en viens icy maintenant voler ſa ſainte maiſon. Mais vien çà ie te demande, ſi tu executes ton meſchant deſſein, qu’eſperes-tu que fera de toy la diuine iuſtice au dernier ſouſpir de ta vie ? Change doncques ta peruerſe inclination, & ne permets point que l’imagination d’vn ſi grand peché entre iamais dans ta penſée, fie toy en moy qui te dis la pure & ſincere verité, & ainſi me puiſſe-elle ayder tout le reſte de ma vie. Antonio de Faria feignant de trouuer bon le conſeil, que le vieillard Hermite Hi-