Page:Les voyages advantureux de Fernand Mendez Pinto.djvu/513

495

de Fernand Mendez Pinto.

quoy que ce fût qui nous appartiẽt. Ainsi differents que nous eſtions en nos opinions, & en tres-mauuaiſe intelligence, nous tardaſmes en cette petite Iſle plus de 9. iours, dans leſquels les 2. Iuncos partirent, ſans que pas vn d’eux nous voulut receuoir & nous ramener, à cauſe dequoy nous fuſmes cõtraints de demeurer en ces ſolitudes, expoſés à pluſieurs grãds dangers, deſquel ie ne croyois pas que nous pûſſions iamais nous eſchapper, ſi Dieu ne ſe fut ſouuenu de nous ; car y ayãt deſia 17. iours que nous eſtions là en vne grande miſere & ſterilité, il vint ſurgir fortuitement en ce lieu vn Corſaire appellé Samipocheca, qui mis en deſroute s’en alloit fuyant la flotte d’Aytao de Chincheo, qui de 28. voiles qu’auoit ce Pyrate luy en auoit pris 26. ſi bien que luy s’eſtoit eſchappé auec les deux vaiſſeaux qui luy reſtoient ſeulement, dans leſquels la pluſpart de ſes gens eſtoient bleſſez, tellement qu’il fut contraint de s’arreſter là 20. iours, afin de les y faire penſer. Or la neceſſité preſente nous contraignant de nous ranger de quelque coſté que ce fut, nous fuſmes contraints de prendre party auec luy, & de nous laiſſer mener où il voudroit iuſqu’à ce qu’il pleuſt à Dieu nous mettre en vn Nauire plus aſſeuré pour nous en aller à Malaca. Ces 20. iours eſtãs paſſés, pendant leſquels les bleſſez furent gueris, ſans que durant ce temps-là il y eut entre nous aucune ſotte de recõciliation du diſcord paſſé. Ainsi en mauuaiſe intelligence que nous eſtiõs, nous nous embarquaſmes auec ce Corsaire, à ſçauoir trois dans le Iunco où il eſtoit, & cinq dans l’autre, dont il auoit fait Capitaine vn ſien neueu. Eſtans partis de ce lieu en intẽtion d’aller ſurgir à vn port appellé Lailoo, à ſept lieuës de Chincheo, & à 80. de cette Iſle, nous continuaſmes noſtre route auec bon vent le long de la coſte de Lamau par l’eſpace de 9. iours, iuſques à ce qu’vn matin s’eſtant preſque tourné en Nord-oüeſt, Sud-eſt, cõme nous fuſmes prés de la riuiere du ſel, qui eſt à cinq lieuës de Chabaquée, le malheur voulut pour nous que nous fuſmes attaquez par vn Corſaire ; qui auec ſept Iuncos fort grands ſe mit à nous combattre depuis les ſix heures du matin iuſques à dix, en laquelle meſlée nous fuſmes traitez à grands coups de traits, & à force