Page:Li estoires de chiaus qui conquisent Constantinople - Robert de Clari.djvu/41

41

LI ESTOIRES DE COUSTANTINOBLE.

rent que li cuens de Saint Pol et mesires Pierres d’Amiens ne retorneroient en nule fin, si vinrent au conte, se li disent : « Sire, vous faites grant honte qui ne vous mouves, « et sachies que, se vous ne chevauchies, nous ne nous « tenrons plus à vous. » Quant li cuens de Flandres oï chou, si feri cheval des espérons et tout li autres après, et poinsent tant qu’il atainsent le bataille le conte de Saint Pol et monseigneur Pierre d’Amiens, et quant il eurent ateinte, si chevauchierent en costé aus tout de front, et le bataille monseigneur Henri chevaucha deriere, et les batailles l’empereur et les noes batailles s’estoient jà si aprochiés que li arbalestier l’empereur traioient bien en nos gens, et nostre arbalestier ensement es gens l’empereur ; et n’avoit que i. tertre à monter entre l’empereur et nos batailles ; et montoient les batailles l’empereur d’une part et les noes d’autre, et quant no gent vinrent en son le tertre et li empereres les vit, si s’aresta, et toute se gent ausi, et furent si abaubi et si esbahi de chou que nos batailles chevauchoient si de front encontre aus, qu’il ne se seurent conseillier. Entrementiers qu’il estoient illueques si* abaubi, les autres batailles Fempereur qui avoient esté envoies entour Tost as Franchois, repairierent ariere et s’asanlerent toutes ensanle avec l’empereur u val, et quant li Franchois virrent trestoutes les batailles l’empereur assanlées ensanle, si s’aresterent en son le tertre tout coi, et se merveillierent que li empereres voloit faire, et envolèrent li conte et li haut homme des iii. batailles li uns as autres, pour prendre conseil que il feroient, s’il iroient dusques à l’ost l’empereur, ou non, et n’eurent mie consel qu’il alaissent, car il estoient moult en sus de l’ost, et s’il se combatoient là où li empereres estoit, chil qui wardent l’ost ne les vesroient mie, ne ne leur porroient aidier, se mestiers en estoit, et, d’autre part, entr’ax et l’empereur avoit uns grans caneus, un grans conduis par où l’iawe venoit en Coustantinoble, que s’il i passaissent, il eussent grant damage de leur gent, et par chou n’eurent il mie consel qu’il i alaissent. Entrementiers que li Franchois parloient ensi ensanle, este me vous que li empereres se mist