Et ne doy mie desvoloir
20 Leur plaisant gracieus voloir,
Einsois y doy mon sentement
Mettre et tout mon entendement,
Cuer, corps, pooir et quanque j′ay.
24 Ne je ne pris un bec de jay
Ceuls qui s′en vorroient ruser.
Car je ne puis mon temps user
En milleur n′en plus bel usage
28 Pour avoir noble et lié corage
Et pour estre gais et jolis,
Gens, joins, apers, cointes, polis.
Car tout homme qui ad ce pense,
32 Il ne riote ne ne tense
N′il ne porroit penser a chose
Ou villenie fust enclose,
Haine, baras ou mesdis.[1]
36 Je le say trop bien par mes dis.
Car quant je sui en ce penser,
Je ne porroie a riens penser
Fors que seulement au propos
40 Dont faire dit ou chant propos ;
Et s′a autre chose pensoie,
Toute mon ouevre defferoie.
Et s′on fait de triste matière,[2]
44 Si est joieuse la manière
Dou fait, car ja bien ne fera
Ne gaiement ne chantera
Li cuers qui est pleins de tristesse,
48 Pour ce qu′il het et fuit leesse.
Mais quant li cuers est pleins de joie,
Il se délite et se resjoie,
En faisant son chant et son dit
