S’entray ens pour moy déporter,
Pleins d’amoureuse maladie,
Et pour oïr la mélodie
Des oisillons qui ens estoient
Qui si très doucement chantoient
Que bouche ne le porroit dire,[1]
N’onques homs vivans n’ot tant d’ire
Que, s’il peiist leur chant oïr,
Qu’il ne s’en deiist resjoïr[2]
En son cuer et que sans séjour
N’entroubliast toute dolour,
Tant avoit en euls de delis.[3]
Et dessus une flour de lis
Li dous rossignolès estoit[4]
Qui renvoisiement chantoit[5]
Et s’efforçoit si de chanter
Que par dessus tout le chanter[6]
Des autres oisillons l’oï,
Dont mes cuers moult se resjoï.[7]
Et quant j’eus oï le déduit
Des oisiaus, tous seus, sans conduit,
M’en alay parmi le vergier,
Pour ce qu’onques, a droit jugier,
Nul si très bel veii n’avoie ;
Car il n’i avoit lieu ne voie
Qui ne fust semez de flourettes[8]
Blanches, jaunes et vermillettes
Ou d’aucune estrange colour.
Si m’abeli tant le demour[9]
Ou vergier par la grant planté[10]
Page:Machaut - Œuvres, éd. Hœpffner, I.djvu/110
Apparence
Le texte de cette page a été corrigé et est conforme au fac-similé.