Or met t’entente au retenir,[1]
Car je ne t’en quier ja mentir.[2]
« Je te di que celle saiette,
Que je tien, en pluseurs cuers gette.
Mais nuls cuers ateins ne férus
N’en sont qui ne soient tenus
Et mis en ma prison joieuse,
Delitable est et gracieuse,
Et qu’amer tous ne les couveingne,
Soit tors, soit drois, comment qu’il prengne.
Et comment que li fers tranchans[3]
En soit devers les fins amans,
Si n’est mie le cop mortel,
Einsois le tesmoingne pour tel
Que nuls n’en voit la blesseûre ;[4]
On y sent sans plaie pointure[5]
Douce, plaisant a soustenir[6]
Et delitable a maintenir ;[7]
Com plus fort point, et plus agrée.
C’est fins déduis, joie esmerée,[8]
Qui vient d’une douceur parfaite
Qui tous en déduit les affaite,
Jusques a tant qu’une chaleur,
Qui naist d’une amoureuse ardeur,[9]
De ceste pointure s’engendre
Es cuers qui aimment sans mesprendre ;
Car chascun d’euls d’amer esprent[10]
Par Désir qui ce leur aprent.
Et quant Désirs si les a pris[11]