Car la joie n’est ordenée
Sans plus que pour estre donnée
Aus amans qui de cuer entier
Aimment pour leurs corps avancier ;
Et s’il aimme sans décevoir,[1]
Si doit la joie recevoir.
Einsi encontre Cruauté
Deffent l’amant douce Pité.
« Mais Franchise, la très courtoise,
Dit a Durté sans faire noise
Qu’il ne se doit point entremettre
De retolir ne de promettre[2]
Les dous biens plaisans, savoureus,
Qui sont fait pour les amoureus ;[3]
Car par Franchise sont acquis
Et par Franchise départis.
Et quant départir on les vuet,
Ja Durté venir n’i estuet,
Cruauté, Dangier ne Paour,
Honte ne Doubtance d’errour.[4]
N’on n’i doit nelui appeller[5]
Qui la joie puist destourner,
Ne par quoy li très dous delis[6]
De la joie soit amenris.[7]
Einsi Durté fait foie emprise
De ce faire, ce dit Franchise.[8]
« Après ce revient Attemprance[9]
Et Hardemens devers Doubtance
Qui li dient, sans arrester,
Que nulle riens ne doit doubter