Dont moult fu regretée et plainte.
Mains einsois qu’elle s’oceïst[1],
Elle commanda qu’on feïst
Un ardant feu en sa presence.
Et quant en sa desesperance[2]
S’ocist, si forment[3] s’envaÿ[4]
Qu’avec le cop en[5] feu chaÿ,
Dont tantost fu arse et bruïe.
Einsi fina Dydo sa vie.
Bien croy que ce fu chose voire,
Car einsi le truis j’en[6] histoire[7].
« Si que, Guillaume, vraiement,
Il me samble tout autrement,
Veües et considerées
Mes raisons devant devisées[8].
Car on puet vëoir clerement
Que grieté[9], peinne, ne tourment[10]
Ne se porroient comparer
Ad ce que celle comparer[11][12]
Volt pour le grief[13] de son amy.
Et fust[14] uns homs trestout enmy[15]
Grant planté de ses annemis,
Qui tuit[16] li eüssent promis
La mort, et tuer le porroient[17]
A leur plaisir, quant il vorroient.
Lui vivant en celle päour,
Non obstant grieté ne frëour,
Se trouveroit il reconfort.
Encor y a un point plus fort :
Page:Machaut - Œuvres, éd. Hœpffner, I.djvu/306
Apparence
Le texte de cette page a été corrigé et est conforme au fac-similé.