A estre Charité nommée
Fait que par ouevre sui prouvée[1],
Dont on en[2] voit les apparans
En tous mes[3] plus prochains parans.
Ce sont li gentil cuer loial
Qui entrent en la court roial
De Bonne Amour qui n’a nul per.
Or entendez en quoy[4] j’aper[5] :
J’aper[6] en souffissans promesses
Et en raisonnables largesses,
Especiaument par donner
Et d’aucuns meffais pardonner ;
Dont eüreus sont cil qui donnent,
Et aussi sont cil qui pardonnent.
Or regardons[7] qu’Amours demande
Qu’on li doint, et plus ne commande[8] :
Elle demande expressement
Les cuers des[9] bons entierement ;
Ce[10] demande elle qu’on li doint.
Et se vuet aussi qu’on pardoint
Aucuns fais, selonc le propos
Pourquoy ces raisons ci propos[11].
Se le moustreray[12] par figure
Que Bonne Amour en moy figure,
Assez briefment, sans prolongier.
« Uns riches homs a[13] un vergier
Ou il a[14] arbres[15] grant planté.
Enseurquetout[16] y a planté
Une moult trés gracieuse ente
Page:Machaut - Œuvres, éd. Hœpffner, I.djvu/316
Le texte de cette page a été corrigé et est conforme au fac-similé.
