Et se celles qui ci parties
Sont contre moy vuelent[1] plus dire,
Ce[2] ne vueil je pas contredire.
Mais j’en ay dit ce qu’il[3] m’en samble,
Present elles toutes ensamble,
Et tant, que je ne doubte[4] mie
Que n’aie droit de ma partie. »
Adont la dame souvereinne,
Des douze[5] droite cheveteinne
Qui avoient parlé pour li,
Dont au juge moult abelli,
Prist a dire tout en oiant :
« De riens ne me[6] va[7] anoiant
Ce qui est fait de nostre[8] plait,
Mais moult souffissanment[9] me plait,
Et bien m’en vueil passer atant.
Sires juges, jugiez atant[10]
Que sentence sera rendue.
Je suis de moult bonne attendue
Pour attendre vostre[11] jugier[12],
Quant il vous en plaira jugier.[13]
Bon conseil avez et seür,
Bien attempré et bien meür.
S’alez, s’il vous plaist, a conseil[14],
Je le lo einsi et conseil,
Et vous consilliez tout a trait.
Faire ne pouez plus biau trait
Que de traitablement attraire
