Tous ſeul, ſans nulle créature,
Et m’enfermay dedens ma chambre,
Com cil qui n’avoit cuer ne membre
Qui ne fremiſt de droite joie,
Pour le grant deſir que ſavoie
De véoir ce riche preſent.
Et quant n’i ot fors moi preſent,
Je pris cette ymage jolie,
Qui trop bien fu entortillie
Des cuevrechiés ma douce amour,
Si la deſliay ſans demour.
Et quant je la vi ſi tres-belle
Je li mis à non : Toute-belle,
Et tantoſt li fis ſacrefice
Non pas de tor ne de genice,
Ainſois li fis loial hommage
De mains, de bouche & de courage,
À genous & à jointes mains.
Et vraiement ce fu du mains ;
Car ſa douce plaiſant emprainte
Fu en mon cuer ſi fort emprainte,
Que jamais ne s’en partira
Tant com li corps par terre ira ;
Ains ſera de moi aourée,
Servie, amée & honnourée,
Com ma ſouveraine déeſſe
Qui gariſt tout ce qu’Amours bleſſe
En moi, où elle ouvra jadis
Trop plus que ſains de paradis.
Car j’eſtoie du tout perdus
Mas, deſconfis & eſperdus ;
Mais .ii. fois m’a reſuſcité
Par franchiſe & douce pitié.
Page:Machaut - Le Voir Dit, 1875.djvu/117
Le texte de cette page a été corrigé et est conforme au fac-similé.
[vers 1351]
63
DU VOIR-DIT.
