Que di-je ? elle ne parla mie,
Car Morphéus, par grant maiſtrie,
Priſt de l’image la figure,
Et à mon lit, de nuit obſcure
Où je ſongeoie moult forment,
Vint & me diſt, en mon dormant,
La requeſte & la complainte
De l’image qui eſtoit painte.
Qui ne ſcet qui eſt Morphéus,
Dont longuement me ſuis téus,
Liſe L’amoureuſe fonteine,[1]
Si le ſara à po de peine.
Ainſi penſoie & repenſoie :
Et, en la penſée où j’eſtoie,
Je penſay que j’avoie tort,
Et que cils fait mal & ſe tort
Qui met créature en priſon
Où il n’a nulle meſpriſon.
Si m’eſveillay & m’aſſeuray,
Et puis mes coffres deffermay
Où l’image eſtoit enfermée
Qui Toute-belle eſtoit nommée.
Je di : « Ma belle, eſtes-vous ci ?
« Je vous requier & pri merci,
« De ce qu’empriſonné vous ay. »
Moult courtoiſement la levay,
Et la remis de ma main deſtre
En lieu où elle ſoloit eſtre,
Et auſſi honorablement.
- ↑ Le Livre de Morpheus ou de la Fontaine amoureuſe.
