Car cils qui vuet tel choſe faire,
Penſer li faut au contrefaire.
Or vueil laiſſier ceſte matiere,
Et retourner à la premiere ;
Et diray ce que je reſcry
Celeément, à pou de cry,
En tel maniere & en tel rime
Corn elle en ſon Rondelet rime :
Belle, bonne & envoiſie,
Plaiſant & douce ſans per,
Je ne vous puis trop loer.
Mes cuers tout à vous ottrie
Son chant, pour vous honnourer.
Belle, bonne & envoiſie,
Plaiſant & douce ſans per.
Et s’ami, de cuer d’amie,[1]
Me daigniés jamais clamer,
Je ne vous vueil plus rouver.[2]
Belle, bonne & envoiſie,
Plaiſant & douce ſans per,
Je ne vous puis trop loer.
Et vez-ci la lettre ſeconde,
C’eſt raiſon qu’à l’autre reſponde :
II.[App. VII.] — Ma tres-chiere & ſouveraine dame, — Quant vous m’apellez ami, — Bien vous doy clamer amie, — Car c’eſt