ne l’entreprenez plus vne autre fois, ſi vous ne voulez auoir la honte d’eſtre encore deſcouuerts : car puis que vous ne m’auez pû tromper, lors que ie ne me deffiois pas de vous, iugez ſi vous le pourriez faire preſentement, que vous vous eſtes rendus ſuſpects. Aronce, & Horace, entendant parler Clelie de cette ſorte, furent eſtrangement ſurpris : car ce qu’elle leur diſoit conuenant à ce qu’elle leur auoit eſcrit à chacun en particulier, ils connurent par là qu’il faloit qu’ils euſſent eſcrit tous deux, & qu’ils euſſent eſcrit d’amour, puis qu’elle leur parloit eſgallement. Si bien que ne pouuant s’empeſcher de teſmoigner leur ſurpriſe, & leur eſtonnement, ils changerent de couleur, ils s’entreregarderent, & regarderent apres Clelie, comme s’ils euſſent voulu chercher dans ſes yeux, ce qu’ils deuoient penſer, & ce qu’ils
