mourir aupres de ſa Maiſtreſſe. Mais comme ces deux Perſonnes n’eſtoient plus en eſtat d’auoir beſoin d’aucun ſecours, ils ne s’y arreſterent pas : & Clelius ordonna ſeulement à deux de ſes Domeſtiques qu’il retrouua, de deſgager ces corps de dedans ces Cendres, & de demeurer aupres, iuſques à ce qu’on pûſt les enuoyer querir : en ſuite dequoy il continua de chercher comme les autres, mais ils chercherent tous inutilement. Cependant on voyoit alors de par tout des Gens qui ſortoient ou des Bois qui eſtoient proches ; ou des ruines de ces Maisons qui eſtoient abatuës ; ou qui ſe releuant de Terre, alloient chercher ou leurs Parens, ou leurs Amis : car cét accident auoit diſperſé toutes les Familles. Ainsi on en voyoit qui pleuroient pour leurs Peres ; d’autres pour leurs Enfans ; d’autres pour
