nulle part à tous les crimes de Tarquin, & la Vertueuſe Tarquinie reſpandit autant de larmes innocentes, que ſon cruel Frere reſpandit de ſang innocent depuis qu’il fut monté au Throſne. Ainſi on peut dire que Brutus eſt né parmy les douleurs : & i’ay oüy dire à Siuelia que iamais Tarquinie n’a eu de veritable ioye depuis la mort de Marcus Iunius, iuſques à la ſienne. Car outre qu’elle auoit horreur de tous les crimes du ſuperbe Tarquin, & de la fiere Tullie, & qu’elle eſtoit ſenſible à tous les malheurs des innocens qu’ils faiſoient perir, elle ſe voyoit elle meſme expoſée à l’iniuſtice, & à la tirannie de ſon propre Frere. Mais afin que vous connoiſſiez plus parfaitement combien la haine que Brutus a pour Tarquin eſt iuſte, il faut que ie vous die en deux mots ce qui cauſa celle de Tarquin pour le Pere de
