les amenerent en Italie. La fortune auoit meſme mis la richeſſe dans la Maiſon de Brutus : en effet Marcus Iunius ſon Pere eſtoit vn des plus riches Citoyens de Rome : auſſi fut ce par cette raiſon que Tarquin auant que de s’eſtre fait Roy, luy fit eſpouſer vne ſœur qu’il auoit qui s’appelloit Tarquinie, dans l’eſperance de ſe ſeruir de la richeſſe de ſon Beau-frere s’il en auoit beſoin, pour faire reüſſir les deſſeins cachez qu’il auoit. Car encore qu’il ſceuſt bien que Marcus Iunius auoit beaucoup de Vertu, & que Tarquinie tenoit plus de l’humeur pacifique du Prince d’Ameriole qui viuoit encore, que de la ſienne, il ne laiſſoit pas de croire que le ſeul intereſt de cette alliance engageroit Iunius à entrer dans tous ſes ſentimens, quels qu’ils puſſent eſtre. Il ſe trompa pourtant en ſes coniectures, car ce genereux Romain ne prit
