Roy, que lors que la bien-seance le vouloit abſolument ; il commanda à Tarquinie de n’aller plus que tres-rarement chez la Reine : & ils ne ſongerent plus l’un & l’autre qu’à bien eſleuer deux Fils qu’ils auoient alors, dont Brutus en eſt vn. Il eſt vray qu’il n’eſtoit encore qu’un ieune Enfant, mais pour ſon Frere qui auoit ſix ou ſept ans plus que luy, il commençoit de pouuoir profiter des inſtructions qu’on luy donnoit. Ce qui irritoit encore fort Tarquin contre Iunius, eſtoit l’uſage qu’il faiſoit de cette prodigieuſe richeſſe qui eſtoit dans ſa Maiſon : car dés que Tarquin auoit vſurpé le bien de quelque Famille Vertueuſe, Iunius & Tarquinie aſſiſtaient ſecretement tous ceux que Tarquin rendoit malheureux; & l’on euſt dit à voir comme ils agiſſoient, qu’ils ſe croyoient obligez d’enrichir
