prés aueque luy, prirent tumultuairement chacun vne de ſes eſpées qu’on auoit trouuées chez Herdonius, & ſe mirent à dire qu’il falloit qu’il periſt : on le prit, on le lia, on le ietta par l’ordre de Tarquin dans la ſource de la Fontaine Ferentine : & l’accablant de pierres apres qu’il y fut, il fut noyé a l’heure meſme. La choſe fut faite ſi promptement, que Lunius ne la ſceut que lors qu’il n’eſtoit plus en pouuoir de l’empeſcher. Neantmoins dés qu’il fut auerty qu’on alloit à main armée chez Herdonius, il ſe mit en chemin pour aller deſtourner Tarquin d’une ſi eſtrange violence. Mais il ne put aller ſi viſte qu’Herdonius ne fuſt deſia mort, & tout ce qu’il put, fut de faire connoiſtre à Tarquin qu’il n’ignoroit pas ſon crime. Pour cét effet il ne voulut plus auoir nul commerce aueque luy, il n’alloit plus au Palais du
