auoit commandé à ſa femme d’eſpouſer cét illuſtre Romain, afin, diſoit-il, de donner vn Pere Vertueux à ſes Enfans, & de reſtituer à ſon Amy vn bien qu’il diſoit meriter mieux que luy, & où il auoit eu beucoup de droit : car il eſtoit certain que Licinius auoit eſté amoureux de Tarquinie, & que Tarquinie n’auoit pas eu d’aduerſion pour luy : Ainſi quoy que l’uſage des ſecondes Nopces ne ſoit pas fort frequent à Rome, Tarquinie qui d’abord n’auoit pû ſe reſoudre à obeïr à ſon Mary, s’y reſolut quand elle ſe vit contrainte de s’enfuïr : s’imaginant qu’il y auoit plus de bien-seance à ſuiure vn Mary en exil, qu’un Amy, quelque Vertueux qu’il pûſt eſtre : & que meſme Licinius, auroit plus de ſoin de ſon Fils, & ſeroit plus inſeparablement attaché à ſa fortune. C’eſt pourquoy la Vertueuſe Tarquinie qui eſtoit enco-
