tout le monde. En effet elle en donna vne marque bien glorieuſe que ie ne puis m'empeſcher de vous raconter, afin que vous connoiſſiez celle qui a preſque inſpiré les premiers ſentimens de vertu à l'illuſtre Brutus. Vous ſçauez donc que Pythagore en mourant laiſſa à ſa fille tout ce qu'il auoit eſcrit pendant ſa vie : ce n'eſt pas qu'il n'euſt vn fils ſçauant & vertueux, mais c'eſt qu'il eſtimoit encore plus ſa fille que luy, & qu'il creût qu'elle obeïroit plus ezactement au commandement qu'il luy fit de ne laiſſer iamais ſortir ſes eſcrits de ſa Maiſon, Cette genereuſe Perſonne bien qu'elle ne fuſt pas riche refuſa conſtamment des richeſſes immenſes qu'on luy offrit ſi elle vouloit bailler ce que ſon illuſtre Pere luy auoit confié : aimant beaucoup mieux demeurer pauvre que de deſobeïr aux dernieres volontez de
